Linda de Haan

Ambassadeur 2026, 2027, 2028

Linda de Haan (Burgum, 1976) is yllustrator en berneboekemakker. Yn 2000 ferskynde yn fjouwer talen tagelyk har earste printeboek ‘Kening & Kening’, dat se tegearre mei Stern Nijland makke. De Haan yllustrearre ferskate Fryske en Nederlânsktalige berneboeken en fersoarge û.o. yllustraasjes foar Tomke-boekjes.

Ferline jier ferskynde ‘Ik wol in bosk op ’e jierdei’, in berneboek wêrfan’t sawol it ferhaal as de yllustraasjes fan har hân binne. It boek waard selektearre foar de White Ravens fan de Internationale Jugendbibliothek München. De White Ravens binne oanbefellingen foar bysûndere boeken út de wrâld fan de ynternasjonale berne- en jeugdliteratuer. Koartlyn ferskynde har nijste berneboek ‘Wetter’.

Mear oer Linda kinst fine op lindadehaan.com.

Nûgje de BBA út!

Wetter

9789493318694

Wisse ferwûnderet him omraak. WETTER. Yn ’e goate, yn ’e sleat, yn in oargel, út ’e loft, út ’e kraan, achter de dyk, op it strân … Magysk fynt er it, en dat is it ek.

Syn mem en master litte him gewurde. Mei it boartsjen en ûntdekken komt ek it respekt foar wetter, tinke se. As Wisse op skoalle in brief oan de takomst skriuwe mei, dan giet dy brief fansels oer wetter, datst dêr net bang foar wêze moatst, moatst der gewoan hiel goed op passe.

Utjûn yn gearwurking mei Wetterskip Fryslân

Ik wol in bosk op ’e jierdei

9789493318267

Simke hat in beam op ’e jierdei frege, dat liket har in moai kado. Bern by har út ’e klasse sizze dat dat net kin, dat in beam in stom kado is ast op de twadde ferdjipping wennest.

Dat sille we noch wolris sjen, tinkt Simke. Se docht gau in winsk yn it moanneljocht en skriuwt – foar de wissichheid – in brief oan de boargemaster. As Simke op in dei wekker wurdt, sjocht se skimen fan tûken en blêden. Is har winsk útkommen, of dreamt se noch?

In fleurich printeboek oer dreamen dy’t útkomme en de magy fan beammen.

Dit boek is der ek yn it Nederlânsk.

Kening & Kening

9789090275727

In humoristysk mearke oer in prins dy’t trouwe moat fan syn mem omdat dy wolris mei pensjoen wol. Der komt in rige prinsessen foarby, mar de prins wurdt der net oars fan, oant der in wûndermoaie prins delkomt…

It boek, dat al yn tolve talen ferskynd is, komt no foar de twadde kear yn it Frysk út, no yn in lytsere edysje.

Leeftyd 3+